اية رايكم يا جماعة فى....

بسم الله الرحمن الرحيم
احب اقولكم فى البدايه انا ليه فكرت فى الفكره دى
اولا : لانى بحبكم و نفسى كلنا نساعد بعض على طاعة الله
و نحشر يوم القيامه كلنا سويا لاننا اجتمعنا على طاعة الله فى الدنيا و ندخل الجنه ان شاء الله
ثانيا : لانى حبيت انكم تشجعونى و اشجعكم اننا ننفذ كل اللى انا هقترحه عليكم دلوقتى من غير ما ننقص منه اى شىء بل يبقى عندنا القدره اننا نزود عليه بأذن الله
ثالثا: احنا دلوقتى لازم نستعد لرمضان زى ما الصحابة كانوا بيعملواعلشان ربنا يبلغنا رمضان ندخل فى الموضوع و اشرحلكم الفكره
1 - هنحافظ على الصلوات فى اوقاتها يعنى كلنا هنسمع الآذآن هنقوم نصلى على طول و نسيب كل اللى فى ايدنا و طبعا الشباب هيصلوا على الاقل 3 صلوات فى المسجد و اوعوا تنسوا طبعا صلاة الفجر
2 - النوافل عارفين احنا هنصلى النوافل ليه علشان يكون عندنا بيوت كثيره فى الجنه فى حد ما يحبش يكون عنده بيوت فى الجنه و ده طبعا لقول رسول الله صلى الله عليه و سلم " ما من عبد مسلم يصلى اثنتى عشرة ركعه تطوعا غير فريضه الا بنى الله له بيتا فى الجنه " و مش هيخدوا مننا اكثر من 10 دقائق قبل او بعد كل صلاه و النوافل هى
ركعتين قبل الفجر - 4 قبل الظهر و 2 بعده - 2 بعد المغرب - 2 بعد العشاء
3 - القرآن مش هقولكم هنقرأ كل يوم جزء لأ هقول حزب بس يعنى نص جزء كل يوم مش هياخد اكثر من ربع ساعه و احنا بنقعد على النت قد ايه بالساعات طبعا
قال رسول الله صلى الله عليه و سلم " من قرأ حرفا من كتاب الله فله حسنه و الحسنه بعشر امثالها لا أقول آلم حرف بل الف حرف , و لام حرف , و ميم حرف " شوف الحزب فيه كام حرف و الحسنه بعشر امثالها و الله يضاعف لمن يشاء و صدقونى هتتعلقوا بالقرآن اوى
4 - ذكر الله هنتفق بأذن الله كل يوم على ذكر واحد مش كتير و هنفضل نردده طول اليوم فى المواصلات و انت قاعد على النت و انت بتشتغل يعنى مثلا النهارده سبحان الله و بكره الحمد لله و بعده الله اكبر و هكذا
5 - الصيام هنصوم يوم الاثنين و يوم الخميس و طبعا اللى عايز يزود جزاه الله خيرا
قال رسول الله صلى الله عليه و سلم " من صام يوما فى سبيل الله باعد الله بينه و بين النار سبعين خريفا"
انا كده خلصت فكرتى مش فاضل غير حاجه واحده بس اعرف رأيكم و مين هيبقى جاد معايا و مين هيسعدنا علشان ندخل الجنه
بتمنى طبعا ان المنتدى كله يكون معايا فى الفكره دى و كل يوم نراجع على بعض و نشوف مين نفذ و مين ما نفذش و لو اى حد عنده رأى عايز يضيفه او عنده تعليق فأنا مستنيه ردودكم و آراءكم
معلش طولت عليكم جزاكم الله خيرا و جعلكم من اهل الجنة

بجد فكره رائعه

شكرا لكى اختاه على الإقتراح المتميز من حضرتك

أسأل الله أن يعيننا على طاعته و إن شاء الله هأحاول ألتزم مع حضرتك فى العمل دا

جزاكى الله خيرا

ان شاء الله اخى
وانا منتظرة التفاعل واهم حاجة النية تكون موجودة عند الجميع
والله المستعان
احترامى لكــ